MEDIGOVO, instalacija

Medigovo,

instalacija

k.o. Savičenta, 459/3, 07, Medigovo, oranica, IV klasa, 3590 metri,

k.o. Savičenta, 459/5, 07, Medigovo, oranica, IV klasa, 1980 metri

Autori: Darko i Felice Pekica

Produkcija: Šikuti Machine

PLES NA ZEMLJI

Besida je o temu da san prija par miseci hodija prevorati robašpanju u Šikute koja ni nikla kako rabi pak je moj tac Felice napensa prevorati i posijati na novo. Kako si čovik pensa na svašta dok dela, tako san pensa o svakakovin pizdarijami dok su vrgnji ubraćali zemlju. Za zvorati tih pet miljari metri z dvobraznima vrgnji mi je rabilo nikih tri ure ud kih su me uve zadnje dvi sakramenski namučile, malo sporadi tega ča san dosti grot zvadija na videlo, malo ča me trahtor strudija aš kad daš gas fergusonu i kad zadiješ za malo žešću grotu i kad trupiš z jaji u manice ud brzin ti dojde pun kurac zemlje. Tako da me ta zemlja počela peštati po malen mozgu i tentati me da ništo š njon učinin i to jušto z ton z Medigovega. Nikakove veze nima to ime zemlje z nami, jedino forši z mojin ocon ki je sakramenski medig za kampanju. Koliko je on voli, toliko gre meni na kurac, magari je i ja na niki mod volin.

To bi ti bilo ukratko to niko tobože objašnjenje tega mojega pensira o zemlji koja bi bila rastegnuta po loži i ukrašena z dvi grote ki zgledaju kako dva postola. Za uveličati zadnji dan plesa u Savičenti bi bilo lipo ud svih ki će biti zadnji dan na festivalu da se zuju i pojdu plesati eli peštati po zemlji, aš zemlja će biti kuntenta, a ljudi će se stopiti z zemljon koja je za vajk.

Ala kuraja i do vidova, na plesu!